اے کسان کے بیٹے
زعفرانی کھیتوں کے چہتے
صبحِ آزادی کی تلاش میں
تاعمر چلنے والے

سامراجی زنجیروں کو
گہری ضرب لگائی تم نے
انقلاب کے نعروں سے
دیوارِ زنداں ہلائی تم نے

آزادیوں کے سفر پہ
تم جھرنوں کی مانند رواں رہے
دور بلندیوں پہ اڑتے پنچھی
تیرے ہم نوا رہے

یخ موسموں کے جزیروں پہ
تم جنگل جنگل چلتے رہے
آزادیوں کے خواب
تیری آنکھوں میں چمکتے رہے

ظلمت کے دیوتاؤں نے
حکم صادر کیا تھا پھر

کہ برفیلی چوٹیوں کا چہتا
یہ جنتِ ارضی کا بیٹا
سحر کے خواب دیکھنے لگا ہے
پھانسی پہ لٹکا دو
اسے سولی پہ چڑھا دو

یہ حاکمِ وقت کو للکارنے لگا ہے اسے مٹا دو!

وقت کے خداؤں کے آگے
سر کبھی نہ جھکایا تم نے
نئی سحر کی خاطر
تختہِ دار کو گلے لگایا تم نے

اپنی مٹی سے اپنے جھرنوں سے
اپنی جھیلوں اور پہاڑوں سے
بلا کا عشق تھا تمہیں
اُنہیں کہ آغوش میں سونا تھا تمہیں

پر روشنیوں کے قاتل
ڈر گے تھے اس قدر تم سے
کہ زنداں کو ہی تیرا مدفن بنا ڈالا
جنتِ ارضی کو ویراں کر ڈالا

ان جفاؤں سے ان سزاؤں سے
تیری ماؤں کے چہرے
سرسوں کے پھولوں کی مانند زرد پڑ گے تھے

تیرے دیس کے بچوں کی آنکھوں سے
خوف مٹ گیا تھا
ان معصوم سی آنکھوں میں
پھر خوں اتر آیا تھا

تیری وادیوں کی نیلی جھیلوں میں
تیرنے لگی تھی لہو کی سرخی
تیری زبان سے نکلا وہ آخری جملہ

میرے وطن تو ضرور آزاد ہو گا!

ہاں اب یہ جملہ ہر زبان پر ہے
کلیاں یہ سن کر جی اٹھتی ہیں
پنچھی اب یہی گاتے ہیں

میرے وطن تو ضرور آزاد ہو گا

دِست قاتل سے کوئی پوچھے
کتنے سر کاٹو گے تم
کتنوں کو پھانسی پہ لٹکاؤ گے
اس دھرتی کی فضاؤں میں
ہر انساں کی اداؤں میں
مقبول بٹ زندہ ہے