پونچھ ٹائمز

پاکستانی زير انتظام جموں کشمير کے علاقے تراڑکھل ميں قوم پرست اتحاد تراڑکھل کے زیر اہتمام شہید کشمیر محمد مقبول بٹ کی بے مثال جدوجہد کو خراج تحسین پیش کرنے کے لیے مشعل بردار ریلی نکالی گئی۔ ریلی کا آغاز بائی پاس چوک سے ہوا ریلی مرکزی بازار سے ہوتی ہوئی مشرقی چوک تراڑکھل پر اختتام پذیر ہوئی۔

شرکا انتہائی جوشیلے نعرے لگاتے ہوئے مشرقی چوک پہنچے جہاں پر ایک مختصر تقریب سے خطاب کرتے ہوئے معروف قوم پرست رہنما قاری نصیر احمد نے شہید کشمیر محمد مقبول بٹ کی جدوجہد پر روشنی ڈالی اور کہا کہ مقبول بٹ شہید آج بھی ہر غاصب اور قابض کے اعصاب پر سوار ہے جدوجہد کے میدان میں اتحاد کے ساتھ آگے بڑھنے میں ہی ہماری کامیابی ہے ریاست جموں کشمیر کی تقسیم مقبول بٹ شہید کے دیوانے کسی صورت نہیں ہونے دیں گے ۔

انہوں نے کہا کہ ہندوستان اور پاکستان مل جل کر ریاست کی بندر بانٹ کرنا چاہتے ہیں مگر ہم جان کی بازی لگانے کے لیے تیار ہیں اور کسی صورت ریاست کی جبری تقسیم کو مستقل نہیں ہونے دیں گے انشاء اللہ جلد ہی غیر ملکی قابضوں کو یہاں سے نکلنا ہو گا ۔