ایران جلادیت کی علامت عزیز سنگھور
![](http://poonchtimes.com/wp-content/uploads/2022/09/Iran-Jallad-Aziz.jpg)
مغربی بلوچستان میں ایسا کوئی دن یا ہفتہ نہیں گزرتا ہے کہ کسی بلوچ کو ایرانی حکام پھانسی پرنہ چڑھادیں۔ہر دن، ہرماہ اور ہرسال زندانوں اورسرعام سڑکوں پر پھانسیوں کا سلسلہ جاری رہتا ہے۔ اس مہذب دنیا میں ایران واحد ملک ہے۔ جہاں بلوچوں کو سڑکوں کے چوراہوں اور بازاروں میں عوام کے سامنے پھانسی دی جاتی ہے۔ جو ایک سفاکیت کی نشانی اور درندگی کی علامت ہے۔ جس سے انسانیت تڑپتی ہے۔ایرانی حکمران جلاد پن کی ساری حدود پار کرچکی ہیں۔ کبھی کبھار ایک ہفتے کے دوران پانچ سے زائد افراد کو پھانسی دی جاتی ہے۔ ان پر نام نہاد پاسداران انقلاب کے خلاف بغاوت کے الزام سمیت مختلف مبینہ جرائم میں ملوث ہونے کے الزامات لگائے جاتے ہیں جو ایرانی حکام کی مرضی اور منشا پر مبنی ہوتے ہیں۔
حال ہی میں دو بلوچ سیاسی قیدیوں کو سینٹرل زاہدان جیل میں پھانسی دے دی گئی۔ دونوں کی شناخت محسن اور عین اللہ کے نام سے ہوئی ہے۔اس سے قبل دوزاپ سینٹرل جیل میں قید تین بلوچوں کو جیل حکام نے پھانسی دے دی تھی۔ پھانسی پانے والے قیدیوں کی شناخت دوزاپ کے علاقے شیرآباد سے سعد اللہ خرکوہی، عبیداللہ خرکوہی اورمحبوب رخشانی کے نام سے ہوئی تھی۔ سعداللہ اور عبیداللہ بھائی تھے۔ ایک اندازے کے مطابق ہرسال نام نہاد اسلامی جمہوریہ ایران کی جیلوں میں کم از کم ڈیڑھ سو سے دوسوکے قریب بلوچوں کو پھانسی دی جاتی ہے۔ پھانسیاں خفیہ طورپراور میڈیا کی کوریج کے بغیر دی جاتی ہیں۔
ہمارے پاس ایسی بھی اطلاعات آتی ہیں۔ جس میں ایک ہفتے کے دوران پانچ بلوچوں کو بیک وقت پھانسی دی گئی۔ جن کی شناخت عبدالباسط خشت، بھنام ریکی، شعیب ریکی، مہربان براھوی، حمید میر بلوچ زئی سے ہوئی۔ ان پر ایرانی حکام کی جانب سے پھانسی دیئے جانے والوں پر ایرانی حکومت کے خلاف بغاوت کا الزام اور اسلام شدت پسندی کے الزامات عائد کئے گئے تھے۔ اس سے قبل اس نوعیت کے کیسز میں بلوچستان سے تعلق رکھنے والے کئی افراد نام نہاد ایرانی پاسداران کے جانب سے پھانسی کے سزا پا چکے ہیں۔ پھانسی دیئے جانے والے افراد مغربی بلوچستان کے مختلف علاقوں زاہدان، ایرانشہر اور سراوان سے تعلق رکھتے تھے جنہیں مختلف اوقات میں گرفتار کرکے پھانسی دی گئی۔
ہم نے یہ دیکھا ہے کہ ایران کے انسانی حقوق کے اداروں و مہذب ممالک سمیت عالمی ادارے برائے انسانی حقوق و میڈیا بلوچ نسل کشی و ایران میں بلوچ نسل کش پالیسی پر خاموشی اختیار کئے ہوئے ہیں، جس کے وجہ سے حکومت کو اپنے مخالفین کو کچلنے کی کھلی چھوٹ مل گئی ہے۔ تہران کی سرکار شروع دن سے ہی بلوچ نسل کشی و انسانی حقوق کی پامالی پر عمل پیرا ہے۔ اب تک سینکڑوں بلوچ نوجوان و بزرگوں کو ریاستی اداروں نے لاپتہ کیا ہوا ہے۔ گرفتار کئے گئے افراد کے لواحقین کو ان کے پیاروں کے بارے میں نہیں بتایا جاتا ہے۔ لواحقین کو دوران گرفتاری انکے رشتہ داروں سے ملنے نہیں دیا جاتا اور جس دن پھانسی کا وقت مقرر کردیا جاتا ہے۔ تو لواحقین کو کچھ وقت کے لئے ملاقات کا وقت دیا جاتا ہے اور پھانسی دے دی جاتی ہے، جس کے باعث لواحقین اپنے پیاروں کوالوداع بھی نہیں کہہ پاتے۔
قدرتی وسائل سے مالا مال ہونے کے باوجود مغربی بلوچستان کے عوام غربت کی لکیر سے نیچے زندگی گذارنے پر مجبور ہیں، جس کی سب سے بڑی وجہ دہائیوں سے جاری استحصال اور بدانتظامی ہے۔
بدقسمتی سے ایران میں مسلک کی بنیاد پر حکومت قائم ہے۔ ایک مسلک کے لئے الگ قوانین اور دوسرے کے لئے الگ قوانین پر عملدرآمد ہوتا ہے۔ ظاہری بات ہے کہ مغربی بلوچستان کی اکثریتی آبادی سنی مسلک سے تعلق رکھتی ہے جس کو(بلوچوں) مراعات حاصل نہیں ہیں جبکہ دوسرے مسلک اور نسل کے لوگوں کو حاصل ہیں۔ انہیں سیاسی، سماجی، معاشی اور اقتصادی مراعات سے محروم رکھا گیاہے۔ اور روزگار بھی ایک اہم مسئلہ ہے۔ اعلیٰ عہدوں اور سرکاری نوکریوں تک رسائی حاصل کرنا ناممکن ہے۔
بیروزگاری کی بڑھتی شرح کی وجہ سے بلوچ نوجوان، جن میں سے کئی اعلیٰ جامعات سے فارغ التحصیل ڈگری یافتہ ہیں، وہ مغربی بلوچستان اور مشرقی بلوچستان کو جدا کرنے والی“گولڈ سمڈ لائن”پر تیل کے کاروبار کرتے ہیں۔ بارڈر پر تیل کے کاروبار ان کی مجبوری ہے تاکہ وہ اپنے گھر کا چولہا جلائے رکھ سکیں۔ گولڈ سمڈ لائن کے اطراف آباد بلوچوں کیلئے یہ آمدن کا واحد ذریعہ ہے، جس کے بغیر شدید غربت اور بیروزگاری کی وجہ سے لوگ فاقوں پر مجبور ہوجاتے ہیں۔ بارڈر پر تیل کے کاروبار سے جڑے ان بلوچوں کو دونوں اطراف پاکستانی اور ایرانی سیکورٹی فورسز کی جانب سے تذلیل کا سامنا رہتا ہے۔ حالانکہ یہ شکایات عام ہیں کہ سیکیورٹی فورسز ان کاروباری افراد سے بھاری رقم رشوت اور بھتے کی صورت زبردستی وصول کرتے ہیں لیکن اسکے باوجود انہیں تنگ کرنے کا سلسلہ نہیں روکا جاتا۔
“گولڈ سمڈ لائن”کے قیام سے اب تک ہزاروں بلوچ موت کے گھاٹ اتارے گئے۔ ان کا قصور صرف اتنا تھا کہ وہ زندہ رہنے کے لئے اشیا خورونوش اور تیل لاتے ہیں اور انہیں سیکیورٹی اداروں کے اہلکار موت کے گھاٹ اتاردیتے ہیں۔ یہ لائن ایک خونی لائن بن چکی ہے۔
سرحد کے دونوں اطراف میں رہنے والے بلوچوں نے”گولڈ سمڈ لائن“ کو کبھی بھی ایک لائن تسلیم نہیں کیا۔ دونوں اطراف میں ایک ہی خاندان کے لوگ آباد ہیں۔ وہ آپس میں تجارت کرتے ہیں اور یہ تجارت تاریخی اور جغرافیائی لحاظ سے آئینی اور قانونی ہے۔ تاہم ایرانی اور پاکستانی حکام اس تجارت کو غیرقانونی سمجھتے ہیں۔
ایرانی کوسٹل سیکیورٹی کی جانب سے مشرقی بلوچستان کے لوگ دوبئی اور خلیج کے دیگر ممالک سے بحری راستوں سے بھی تجارت کرتے ہیں۔ جبکہ مشرقی بلوچستان کے بے شمار ماہی گیر اپنی سمندری حدود میں مچھلی کا شکار کرتے ہیں۔ انہیں بھی گرفتار کیا جاتا ہے۔ انہیں سخت سے سخت سزائیں دی جاتی ہیں۔ ان کے املاک کو بھی ضبط کیا جاتا ہے۔ ہمارے پاس یہ بھی اطلاعات ہیں کہ بے شمار ایسی لانچیں ایرانی حکومت کے تحویل میں ہیں جو دوبئی سے تجارت کے غرض سے واپس آرہی ہوتی ہیں۔ انہیں بین الاقومی سمندری حدود میں تحویل میں لیا جاتا ہے۔ لوگوں کو قید و بند کی سخت سزائیں دی جاتی ہیں۔ اس وقت ایران کی بے شمار جیلوں میں لوگ بند ہیں جبکہ دوسری جانب پاکستانی سفارتخانے کا عملہ بھی ان کی مدد کرنے نہیں آتا۔ جس کی وجہ سے وہ بے بنیاد الزامات کی وجہ سے جیلوں میں قید رہتے ہیں۔ شاید دونوں ممالک (پاکستان اور ایران) کی سرکار اس بات سے ایک ایجنڈے پر قائم ہیں کہ بلوچ کو سیاسی معاملات سے دور کرنے کے ساتھ ساتھ انہیں ذریعہ معاش سے بھی محروم رکھنا ہے۔ دونوں سرکار کی پالیسیوں کی وجہ سے دونوں ممالک میں بلوچ ایک انسرجنسی کے دور سے گزررہا ہے۔ دراصل یہ انسرجنسیز دونوں سرکاری کی غلط پالیسیوں سے منسلک ہے۔
Related News
![](http://poonchtimes.com/wp-content/uploads/2024/08/B-2-400x200.jpg)
بنگلہ دیش کی صورتحال: بغاوت اور اس کے بعد۔۔۔ بدرالدین عمر
Spread the love(بدرالدین عمر بنگلہ دیش اور برصغیر کے ممتاز کمیونسٹ رہنما ہیں۔ وہ بنگلہRead More
![](http://poonchtimes.com/wp-content/uploads/2024/08/1-400x200.jpg)
بلوچ راجی مچی ڈاکٹر شاہ محمد مری
Spread the love ڈاکٹر ماہ رنگ بلوچ اور اُس کی بلوچ یک جہتی کمیٹی نےRead More