سورج کبھی بوڑھا نہیں ہوتا اعجاز منگی
![](http://poonchtimes.com/wp-content/uploads/2022/02/387067_110320089147584_1422255652_n.jpg)
ایک غیور بلوچ جب بچہ ہوتا ہے
تب وہ اپنی ماں کے بادل جیسے آنچل میں
کوندتی بجلی کی طرح نظر آتا ہے
ایک غیور بلوچ جب جوان ہوتا ہے
تب وہ پتھروں پر رقص کرتے ہوئے
آبشار کی مانند دکھائی دیتا ہے
ایک غیور بلوچ جب بوڑھا ہوجاتا ہے
تب وہ اپنی سنگریز سرزمیں پر سربلند
پہاڑ کی صورت اپنا لیتا ہے
میں نے کامریڈ یوسف مستی خان کا
بچپن نہیں دیکھا مگر جب وہ جوان تھا
تب وہ مجھے بابائے بلوچستان
میر غوث بخش بزنجوکے پہلو میں
اس طرح دیکھا تھا نظر آیا تھا
جس طرح کسی پہاڑ کے سائے میں
چمکتا اور دمکتا سورج نظر آتا ہے!!
شاہ لطیف نے لکھا ہے”سورج کبھی بوڑھا نہیں ہوتا“
یوسف مستی خان کا جسم تو بوڑھا ہوا ہے مگر
اس کا کردار آج تک بوڑھا نہیں ہواہے
وہ سرکش سورج جو سیاست کی سیاہ راتوں میں
انگنت ستاروں کی صورت پہاڑوں پر بکھر جاتا ہے
وہ سورج کل کینسر سے لڑتے جھگڑتے ہوئے
گوادر کی ان گلیوں میں گشت کرنے لگا
جہاں بلوچستان کی بیٹیوں نے چادر کو پرچم بنایا
اور روشنی کا گیت گایا
کیا کوئی قانون سورج کو سلاخوں کے پیچھے قید کرسکتا ہے؟
کیا کوئی حکومت کرنوں پر حکم چلا سکتی ہے؟
کیا کوئی ریاست روشنی کو شکست دی سکتی ہے؟
یوسف مستی خان تو مست یوسف ہے
زلیخا جیسا زندان اسے قابو نہیں کرستا
اس کے کردار کا دامن آج بھی سلامت ہے
اس کا ہر لفظ آج بھی سرخ صداقت ہے
اس کا ہر دن میدان جنگ ہے
وہ جو ایک انسان ہے
وہ جو ایک امنگ ہے
آئیں! اس یوسف سے اظہار محبت کریں
جوشعور کی مشعل جلانے کا مجرم ہے
کون کہہ سکتا ہے کہ وہ ایک غم ہے؟
وہ تو اس آگ کا غصہ ہے
جو خانہ بدوش قبیلوں کے خیموں میں
مخالف ہواؤں سے لڑتی ہے
وہ آگ جو ایک لمحے کے لیے تو بظاہر بجھتی ہے
اور دوسرے لمحے بھرپور انداز سے بھڑکتی ہے!!
سلام ان آنکھوں کو جن میں شعلہ جلتا ہے
سلام ان سینوں کو جن میں سورج پلتا ہے
Related News
![](http://poonchtimes.com/wp-content/uploads/2024/08/B-2-400x200.jpg)
بنگلہ دیش کی صورتحال: بغاوت اور اس کے بعد۔۔۔ بدرالدین عمر
Spread the love(بدرالدین عمر بنگلہ دیش اور برصغیر کے ممتاز کمیونسٹ رہنما ہیں۔ وہ بنگلہRead More
![](http://poonchtimes.com/wp-content/uploads/2024/08/Water-400x200.jpg)
حق ملکیت کا سوال تحریر: الیاس کشمیری
Spread the love پسماندہ سماجوں بالخصوص نوآبادیاتی سماجوں میں عوامی تحریکوں اور مزاحمت کی ابتدائیRead More