پونچھ ٹائمز

پاکستانی زير انتظام جموں کشمير کے ضلع سُدھنوتی کے علاقے گڑالہ ميں جموں کشمیر لبریشن فرنٹ گڑالہ یونٹ کے زیر اہتمام شہید افضل گورو اور شہید کشمیر محمد مقبول بٹ کی لازوال قربانیوں اور جدوجہد کو خراج تحسین پیش کرنے کے لیے مشعل بردار ريلی کا انعقاد کيا گيا ہے۔

جاری تفصيلات ميں بتايا گيا ہے کہ آج 9 فروری کی شام نکر سے گڑالہ بازار تک مشعل بردار ریلی نکالی جائے گی۔ مشعل بردار ريلی کا مقصد شہید افضل گورو اور شہید کشمیر محمد مقبول بٹ کی لازوال قربانیوں اور جدوجہد کو خراج تحسین کرنا ہے۔ مقبول بٹ شہيد جدوجہدِ آزادی کا استعارہ ہيں اور اُنکی جدوجہد و قربانی تاريخ ميں ہميشہ سنہری حُروف سے لکھی جاۓ گی۔

لبريشن فرنٹ کے رہنما اور گڑالہ يونٹ کے بانی سردار افتخار نے پونچھ ٹائمز سے گفتگو کے دوران بتايا کہ مقبول احمد بٹ شہيد ، شہيد افضل گورو سميت جملہ شُہدا کی قربانياں ضرور رنگ لائيں گئ اور رياست جموں کشمير ايک دن آزاد اور خود مختار مُلک کے طور پر دُنيا کے نقشے پہ موجود ہو گا۔ انہوں نے کہا کہ غلام سماج ميں آزادی کی جدوجہد کتنی مشکل ہے آج 2021 ميں جدوجہد کرنے والے لوگ سمجھ سکتے ہيں ۔ ذرا غور کيجيے کہ آج سے تيس سال يا اُس سے پہلے آزادی کی جدوجہد کرنا کتنا مشکل کام تھا۔ انہوں نے کہا کہ شہدا کی جدوجہد و قربانيوں کو خراجِ عقيدت و تحسين پيش کرنا زندہ دلوں اور باشعور لوگوں کا شيوہ ہے۔
انہوں نے عوام اور خاص کر نوجوانوں سے التماس کی ہے کہ وہ اس ريلی ميں شرکت کر کے اپنی قومی بيداری کا ثبوت ديں۔