پونچھ ٹائمز)

جموں کشمير پيپلز نيشنل پارٹی کے سينئر رہنما اور سابق مرکزی ترجمان حبيب الرحمن ايڈووکيٹ نے کہا ہے کہ مظفرآباد ميں پاکستانی سينٹ کا پانچ اگست کو اجلاس منعقد کر کے يہ ثابت کيا جا رہا ہے کہ دونوں قابض ممالک پاکستان و ہندوستان رياست جموں کشمير کی تقسيم و انضمام پہ باہمی اتفاقِ راۓ سے کام کر رہے ہيں۔ جاری بيان ميں اُن کا کہنا تھا کہ رياست جموں کشمير کے عوام کو اب آنکھيں کھولنی ہی ہونگی چونکہ قابض قوتيں مادرِ وطن رياست جموں کشمير کی تقسیم در تقسيمی پہ ايکدوسرے کے ساتھ مل کر کام کر رہی ہيں۔
تفصيلات کے مطابق گزشتہ روز پاکستانی زير انتظام کشمير کے وزير اعظم فاروق حيدر کے دفتر سے جاری بيان کے مطابق چیئرمین سینیٹ صادق سنجرانی نے 5 اگست کو مظفرآباد میں خصوصی اجلاس کے انعقاد سے آگاہ کیا۔
ياد رہے پاکستان کی تاریخ میں ايسا پہلی مرتبہ ہوگا کہ پارلیمنٹ کے کسی ایوان کا خصوصی اجلاس ایک ایسے مقام میں ہوگا جو فیڈریشن کا حصہ نہیں ہے۔
حبيب الرحمن کا کہنا تھا کہ دونوں ممالک اپنے اپنے طريقوں سے جموں کشمير و گلگت بلتستان کے عوام کو بے وقوف بنا کر اپنا اُلو سيدھا کر رہے ہيں۔ اب وقت ہے کہ قابض قوتوں کے خلاف آواز بلند کی جاۓ۔ انہوں نے کہا کہ جموں کشمير پېپلز نيشنل پارٹی قابضين کے جملہ اقدامات کو مُسترد کرتے ہوۓ رياست جموں کشمير کی قومی آزادی اور سوشلسٹ سماج کے قيام کی جدوجہد ميں تيزی لانے کا اعلان کرتی ہے۔