کبھی ایک اِرم کے گوشے میں
گاہ اک برباد خرابے میں
کبھی شہد مُلبب کاسے میں
گاہ زہر بھرے تلخابے میں
اک ساز سنائی دیتا ہے
اک چیخ سنائی دیتی ہے

اس کیف عذاب کے عالم میں
ان آس نراس کے لمحوں میں
جانے وہ کون سا لمحہ تھا
جب شوپنہار نے جھانکا تھا
اورگھنگروچھن چھن ناچے تھے

تب سے کچھ آوارہ روحیں
کچھ دیر،کبھی کچھ دن کے لیے
مجھ پر چابک برساتی ہیں
اس دوزخ میں لے جاتی ہیں
احساس کی برزخ ختم جہاں
جاں ساز نہیں ، جاں چیخ نہیں
ہر ایک عمل جاں لایعنی
ہر کام عبث بیکار جہاں
ہیں چھن چھن گھنگروناچ رہے
بس شوپنہار کے اشکوں پر