مظفرآباد کے ایوان میں محصور بے ضمیر قیدیو
تم کس مرض کی دوا ہو
ہمارا ملک تاریخ کے بدترین دور سے گزررہا ہے پون صدی کا تنازع ایک ایسے طریقے سے ختم کرنے کی کوششیں ہورہی ہیں جس میں مادر وطن کے دوکروڑ انسانوں کی کسی سطح پر کوئی رائے شامل نہیں
ہم پہلے بھی متعدد بارکہہ چکے ہیں کہ گزشتہ سال پانچ اگست کے ہندوستانی فیصلے کو اختتام نہیں آغاز سمجھیں معاملہ یہاں پر رکے گا نہیں
لیبر پارٹی برطانیہ کے نئے سربراہ کا حالیہ پالیسی بیان کہ مسئلہ کشمیر پرپاک وہند کے ممالک آپس میں بیٹھ کر حتمی فیصلہ کریں محض بیان نہ سمجھا جائے بلکہ مستقبل کے عالمی قوتوں کے عزائم کی طرف واضح اشارہ ہے
ان دنوں انڈین میڈیا پی او کے پر حملہ کرنے کی منصوبہ بندی کو جس طرح زیر بحث لارہا ہے اس میں بھی سمجھنے کیلئے کافی سامان ہے
یاد رہے عالمی طاقتوں کو نہ مسئلہ کشمیر سے دلچسپی ہے اور نہ ہی جنوبی ایشیاء کے امن سے
لہذا واضح اشارے مل رہے ہیں کہ عالمی سامراجی قوتیں اس خطے میں انڈیا کو چین کے مقابلے میں طاقت بخشنا چاہتی ہیں جس کے لیے مسئلہ کشمیر کا ایسا مستقل حل جو عالمی سامراج اور ہندوستان کے حق میں ہو پر کام ہورہا ہے
مستقبل قریب میں ممکنہ جنگ کے منڈلاتے بادل صاف دکھائی دے رہے ہیں
بظاہر اس جنگ میں امریکہ اور برطانیہ غیر جانبداری کا اظہار کریں گے لیکن پس پشت ہندوستان کو سپورٹ کررہے ہوں گے
پاکستان کا مستقبل ہندوستان کی طفیلی ریاست کے طور پر دکھائی دے رہا ہے
حالات بدل رہے ہیں دونوں قابض ممالک کے ساتھ ساتھ عالمی قوتیں منصوبہ بندی میں جت چکی ہیں لیکن مظفرآباد کے ایوان میں بیٹھے مفت خور اور ملک وقوم کے دشمن ناعاقبت اندیش نااہل حکمران نما سیاسی بونے ہیں کہ اپنے خوابوں کی دنیا سے باہر نکلنے کے بارے میں سوچتے تک نہیں
یہ وقت ہے کہ تم تھوڑی ہمت کرو اپنے ضمیروں کو جھنجوڑو اور سامنے آکر کہو کہ شملہ معاہدہ توڑو اور خود مظفرآباد کے ایوان میں معاہدہ کراچی توڑنے کی قرارداد لے کر آو
خود کو منوانے کا یہ بہترین موقع ہے کہ ہم کسی ایسے معاہدے قانون اور فیصلے کو نہیں مانتے جس میں ریاست جموں کشمیر کے لوگوں کی شمولیت نہ ہو
تمہاری مجرمانہ خاموشی کی ایک وجہ تو بالغ نظری اور سیاسی فہم وبصیرت کافقدان ہے لیکن دوسری وجہ لولے لنگڑے اقتدار سے محرومی کا خوف ہے
یاد رکھو جس غلام اقتدار سے تم چمٹے ہو اس کاوقت بھی ختم ہونے کو ہے
اگر ہمت و جراءت کر لو تو اس سے کئی گنا باعزت اقتدار تمہارے دروازے پر دستک دے رہا ہے
ورنہ تاریخ تمہیں میر جعفر و میر صادق ہی لکھےگی
نہ سمجھو گے تو مٹ جاو گے یا مٹا دیئے جاو گے